پاکستان د اسلام پېغمبر ته په سپکاوي تورنه اسیه بي بي له بند خوشې کړه

د پاکستان د سترې محکمې له لوري بري شوې عیسوۍ اسیه بي بي له ملتان جېل خوشې شوه.

د پاکستان د کورنیو چارو وزارت وايي، اسیه بي بي له خوشي کېدو وروسته د راولپنډۍ نور خان هوايي اډې له لارې د خپلې کورنۍ سره بهر ته لاړه.

پر دې او کورنۍ سربېره یې پاکستان کې د یوه اروپايي هېواد ډيپلوماټ هم الوتکه کې سپور شو.

خو مالومه نه ده چې اسیه بي بي کوم هېواد ته لاړه.

خو د پاکستان د لومړي وزیر د رسنیو سلاکار افتخار دوراني له رسنیو سره خبرو کې دا نه ده منلې چې اسیه بي بي له دغه هېواد وتلې.

له دې مخکې د اسیه بي بي وکیل سیف الملکو هم ویلي و چې نوموړې له ملتان بند خوشې شوې ده.

اسیه بي بي پر ۲۰۰۹ کال د اسلام پېغمبر ته په سپکاوي تورنه او ۲۰۱۰ کال کې په مرګ محکومه شوه، خو تېره میاشت د پاکستان سترې محکمې د دغه هېواد د عالي محکمې دا پرېکړه لغوه کړه.

په دې سره پاکستان کې څو ورځې مظاهرې روانې وې، خو وروسته د حکومت او مظاهره چیانو ترمنځ جوړ جاړی وشو.

له بلې خوا د اسیه بي بي د خوشي کېدو په هکله تحریک لبیک غبرګون کې ویلي چې د هغې خوشي کېدلو سره حکومت له دوی سره د خپل تړون خلاف ورزي وکړه.

په بیان کې زیاته شوې چې د اسیه بي بي د خوشي کېدو له خبر وروسته ټول پاکستان کې خلک غوسه دي.

د پنجاب حکومت وايي، که د تحریک لبیک ډله د مظاهرو لپاره بیا ووځي، مشران به یې په کور نظر بند کړي.  


پرنت   ايميل