قریشي: اسلام اباد د سولې لپاره د کابل د هڅو ملاتړ کوي

د پاکستان د بهرنیو چارو وزیر شاه محمود قریشي وايي، اسلام اباد افغانستان کې د سولې لپاره د افغان حکومت د هڅو ملاتړ کوي.

"اسلام اباد د سولې لپاره د کابل د هڅو ملاتړ کوي".

شاه محمود قریشي د ملګرو ملتونو ۷۳ کلنۍ ناسته کې د خبرو پر مهال وویل، چې افغانستان او پاکستان له ډېر وخت راهیسې د بهرنیو ځواکونو د ورانپوهاوي نښه ګرځېدلي دي.

هغه په افغانستان کې پر داعش هم اندېښنه وښوده.

د نوموړي دا خبرې په داسې مهال دي چې د افغانستان د عالمانو شورا یو ۷ کسیز پلاوي د جمعې په ورځ د پاکستان بهرنیو چارو وزارت کې د دغه هېواد له عالمانو سره پر یوه لویه ګډه غونډه خبرې درلودې.

د روانې میاشتې پر پنځلمسه کابل کې د افغان ولسمشر محمد اشرف غني او شاه محمود قریشي په لیدنه کې د دواړو هېوادونو د عالمانو پر ګډه غونډه هوکړه وشوه.

د افغانستان د سولې عالي شورا وایي، د دوی تمه دا ده چې ګډه غونډه لومړی په اسلام اباد او دویمه هغه یې په کابل کې جوړه شي.

په دغو غونډو کې به د افغانستان د جګړې په اړه له دیني اړخه بحث کیږي.

له بلې خوا د افغانستان د سولې عالي شورا وایي له وسلوالو طالبانو سره د مخامخ خبرو لپاره تیاری نیسي.

دې شورا په همدې په موخه له ۳۴ ولایتونو د سولې د کمېټو استاز ته ورکشاپ جوړ کړی چې له وسلوالو طالبانو سره د سولې خبرو لپاره نوې لارې وروښيي.

دغو سیمه ییزو استازو ته د روزنې لپاره د افغانستان سولې عالي شورا د جګړې ختمولو او سولې خبرو نویو لارو- چارو زدکولو په موخه له بېلا بېلو بهرنیو هیوادونو پنځه کارپوهان هم کابل ته راغوښتي دي.


پرنت   ايميل