وروستي خبرونه:

کندوز: طالبانو لسګونه مسافر تښتولي

د افغانستان د شمال ختیځ کندوز ولایت چارواکي وايي، وسله والو کسانو د کندوز - تخار پر لویه لاره لسګونه مساپر له ځان سره بېولي دي. دغه پېښه د افغان حکومت له لوري له طالبانو سره تر مشروط اوربند یوه ورځ وروسته رامنځته شوې ده.

د کندوز د امنیې قومندانۍ ویاند عصمت مرادي رسنیو ته وویل، وسله والو کسانو ۳ دانې له سپرلیو ډک ۴۰۴ ډوله مسافر وړونکي موټر تښتولي دي.

ارګ: غزني ته نور تازه دم سرتېري واستول شول

افغان ولسمشر محمد اشرف غني پرېکړه وکړه چې غزني ته به ډېر ژر زیاتي ملاتړي ځواکونه واستوي.

د ولسشمر مرستیال ویاند شاه حسین مرتضوي په خپله فېسبوک پاڼه لیکلي ښاغلي غني بیګا د دولسم اګسټ په ماخوستن په ارګ کې بېړنۍ غونډه وکړه:

"د غزني له والي، امنیه قومندان، ملي امنیت مشر او د تندر قول اردو قومندان سره یې خبرې وکړې او د غزني د امنیتي حالت په اړه یې د هغوی تفصیلات واورېدل".

شاه حسین مرتضوي زیاتوي، په اخر کې پرېکړه وشوه چې غزني ته نور سرتېري واستول شي.

اروپایي ټولنه: د جنرال دوستم قضیه دې وڅېړل شي

اروپايي ټولنې د افغان ولسمشر د لومړي مرستیال جنرال عبدالرشید دوستم د هغې حقوقي قضیې د څېړلو غوښتنه کړې چې د ده پر ضد په محکمه کې روانه ده.

کابل کي د اروپايي ټولنې او ناروې ماموریت ویلي؛ دا چې د افغانستان د ولسمشر لومړی مرستیال دغه هېواد ته ستون شوی، دوی تمه لري چې د افغانستان نافذه قوانیو له مخې د هغه پرضد شته دوسیه قانوني پړاوونه ووهي او بشپړه شي.

لوګر: د ښوونځیو بیا پرانیستل کېدو د "اختر د اوربند په څېر خوښ کړم "

د افغانستان په لوګر ولایت کې ۱۰۳ ښوونځي تر شاوخوا دوو اونیو تړل کېدو وروسته بېرته پرانیستل شوي دي.